32

عجمان، اماراتی نوجوان سوئمنگ پول میں ڈوب کر جاں بحق

عجمان: متحدہ عرب امارات کی ریاست عجمان میں اماراتی نوجوان سوئمنگ پول میں ڈوب کر جاں بحق ہوگیا۔

عرب میڈیا کے مطابق متحدہ عرب امارات کی ریاست عجمان میں جم کے سوئمنگ پول میں ڈوب کر اماراتی نوجوان جاں بحق ہوگیا، واقعے کا ذمہ دار جم کے کوچ کو قرار دیا جارہا ہے۔

عجمان پولیس کا کہنا ہے کہ اماراتی نوجوان کے جاں بحق ہونے کا کیس سرکاری وکیل کے سپرد کردیا گیا ہے۔

پولیس نے تیراکی کے کوچ کو غفلت کا ذمہ دار قرار دیا جبکہ اماراتی نوجوان کی شناخت ظاہر نہیں کی گئی ہے۔

عجمان پولیس چیف بریگیڈیئر عبداللہ احمد الحمرانی کا کہنا ہے کہ جمنازیم کا کوچ کسی دوسرے کام میں مصروف تھا جس کی وجہ سے اماراتی نوجوان کی موت واقع ہوئی۔

رپورٹ کے مطابق مقتول تیراکی نہیں جانتا تھا اور کوچ کو جب واقعے کا علم ہوا تو نوجوان جاں بحق ہوچکا تھا۔

واضح رہے کہ گزشتہ ماہ شارجہ کے علاقے النہدا میں 11 سالہ بچہ تیراکی سیکھتے ہوئے سوئمنگ پول میں ڈوب کر جاں بحق ہوگیا تھا۔

یاد رہے کہ شارجہ کے نجی اسکول کے سوئمنگ پول میں چار سالہ طالب علم 14 نومبر کو ڈوب گیا تھا، اسکول انتظامیہ کو جب واقعے کی اطلاع ملی تو انہوں نے بچے کو ایمبولینس کے ذریعے القاسمی اسپتال منتقل کیا مگر وہ جانبر نہ ہوسکا تھا۔

خیال رہے کہ گزشتہ برس جون میں دو بچے اُس وقت سوئمنگ پول میں ڈوب کر جاں بحق ہوگئے تھے جب والدین افطاری کرنے میں مصروف تھے۔

اس خبر پر اپنی رائے کا اظہار کریں

اپنا تبصرہ بھیجیں