31

’امریکا شکیل آفریدی کو مانگ رہا ہے، چاہتے ہیں عافیہ صدیقی کو بھی رہائی ملے‘

کراچی: گورنر سندھ عمران اسماعیل نے کہا ہے کہ امریکا کافی عرصے سے ڈاکٹر شکیل آفریدی کو مانگ رہا ہے، ہم چاہتے ہیں ہماری بیٹی ڈاکٹر عافیہ کو بھی رہائی ملے۔

تفصیلات کے مطابق گورنر سندھ عمران اسماعیل نے میڈیا سے گفتگو کرتے ہوئے کہا کہ پہلی دفعہ پاکستانی قوم فخر سے کھڑی ہے، امریکی صدر نے پاکستانیوں کی تعریف کی ہے۔

گورنر سندھ نے کہا کہ پاکستان میں میڈیا بالکل آزاد ہے، میڈیا کو شاید اتنی آزادی بھارت میں بھی حاصل نہیں ہے۔

واضح رہے کہ گزشتہ روز وزیر خارجہ شاہ محمود قریشی نے کہا تھا کہ دورہ امریکا مثبت سمت میں چل رہا ہے، شکیل آفریدی کے معاملے پر ابھی کسی فورم پر بات نہیں ہوئی ہے۔

خیال رہے کہ گزشتہ روز امریکی صدر ڈونلڈ ٹرمپ سے ہونے والی ملاقات میں ایک سوال کے جواب میں وزیر اعظم عمران خان نے کہا تھا کہ عافیہ صدیقی کے کیس پر ابھی بات کی جائے گی.

بعد ازاں انھوں نے امریکی میڈیا کو خصوصی انٹرویو دیتے ہوئے شکیل آفریدی اور عافیہ صدیقی کے تبادلے کو امکانی قرار دیا تھا.

یاد رہے کہ پاکستانی خاتون عافیہ صدیقی کو نیویارک کی ایک عدالت نے 86 برس کی قید کی سزا سنائی تھی، عافیہ صدیقی امریکا کے بین الاقوامی سطح پر مشہور تعلیمی ادارے میساچوسیٹس انسٹیٹیوٹ آف ٹیکنالوجی میں زیر تعلیم رہ چکی ہیں اور وہ ایک ہونہار نوجوان سائنس دان تصور کی جاتی تھیں۔

اس خبر پر اپنی رائے کا اظہار کریں

اپنا تبصرہ بھیجیں