42

شارجہ، بس اور موٹر سائیکل میں تصادم، 2 ایشیائی شہری جاں بحق

شارجہ: متحدہ عرب کی ریاست شارجہ میں بس اور موٹر سائیکل کے درمیان خوفناک تصادم کے نتیجے میں 2 ایشیائی شہری جاں بحق ہوگئے۔

تفصیلات کے مطابق شارجہ انڈسٹریل ایریا میں تیز رفتار موٹر سائیل اور بس میں ہولناک تصادم کے نتیجے میں 2 افراد جاں بحق اور متعدد زخمی ہوگئے، ہلاک و زخمیوں کو مقامی اسپتال منتقل کردیا گیا۔

شارجہ ٹریفک پولیس کے مطابق حادثہ موٹر سائیکل سوار نوجوانوں کی غفلت کے سبب پیش آیا جب انہوں نے ٹریفک سگنل کو نظر انداز کرتے بس سے ٹکرا گئے، موٹر سائیکل قلابازیاں کھاتی ہوئی دور جاگری۔

پولیس کے مطابق حادثے کی اطلاع شام 7 بجکر 15 منٹ پر ملی، ٹریفک پولیس، ریسیکیو ٹیمیں اور ایمبولینس فوری طور پر جائے وقوعہ پہنچیں۔

حادثے اتنا خطرناک تھا کہ موٹر سائیکل سوار موقع پر ہی دم توڑ گئے جبکہ بس میں سوار متعدد افراد زخمی ہوئے جنہیں کویتی اسپتال منتقل کردیا گیا ہے جہاں انہیں طبی امداد دی جارہی ہے۔

ڈائریکٹر جنرل شارجہ ٹریفک اینڈ پیٹرول ڈیپارٹمنٹ لیفٹیننٹ کرنل محمد ال نقبی کا کہنا تھا کہ شارجہ پولیس کی جانب سے حال ہی میں ایک مہم شروع کی گئی ہے جس میں بغیر لائسنس موٹر سائیکل سواروں اور ٹریفک قوانین کی خلاف ورزیاں کرنے والے افراد پر جرمانہ عائد کیا جارہا ہے۔

انہوں نے کہا کہ شارجہ میں ہونے والے زیادہ تر حادثے سائیکل اور موٹر سائیکل سواروں کی غفلت کے نتیجے میں پیش آتے ہیں، متعدد بغیر لائسنس موٹر سائیکلیں ضبط بھی کی جاچکی ہیں۔

لیفٹیننٹ کرنل محمد ال نقبی نے کہا کہ سائیکل اور موٹر سائیکل سواروں کے خلاف کریک ڈاؤن جاری رہے گا اور آگاہی کے لیے مہم بھی چلائی جائے گی جس میں ڈیلیوری بوائز کو بھی حادثے سے بچاؤ کے لیے آگاہ کیا جائے گا۔

اس خبر پر اپنی رائے کا اظہار کریں

اپنا تبصرہ بھیجیں