31

پنجاب: 22سے 25جولائی تک انسداد پولیو مہم دوبارہ ہوگی

پنجاب کے اضلاع لاہور اور جہلم میں دو بچوں میں پولیو وائرس کی موجودگی کا معاملے پر پنجاب پولیو پروگرام کی جانب سے ایک بار پھر پولیو مہم شروع کرنے کا فیصلہ کرلیاگیاہے۔

پنجاب پولیو پروگرام کے تحت 22 سے 25 جولائی تک انسداد پولیو مہم لاہور، جہلم اور سرگودھا کی منتخب یونین کونسلز میں منعقد کی جائے گی۔

منتخب یونین کونسلز میں 126,000 سے زائد بچوں کو پولیوسے بچاﺅ کے قطرے پلائے جائیں گے۔لاہور کے شالامار ٹاﺅن اور راوی ٹاﺅن کی منتخب 10یونین کونسلز کو مہم میں شامل کیا گیا ہے۔

اسی طرح جہلم کی پانچ اور سرگودھا کی 6 یونین کونسلز میں انسداد پولیو مہم کا انعقاد کیا جائے گا،پولیو سے بچاﺅ کے قطرے پلانے کے لئیے 340سے زائد انسداد پولیو ٹیمیں تشکیل دے دی گئی ہیں۔ پنجاب سے دو نئے پولیو کیس آنے کے بعد پاکستان بھر میں اب پولیو کیسز کی تعداد 45 ہو گئی ہے۔

وزارت قومی صحت کے ذرائع نے8 جولائی کو ہم نیوز کو بتایا تھا کہ 2 پولیو کیسز خیبر پختونخوا (کے پی) اور 2 بلوچستان سے سامنے آئے ہیں ۔

بلوچستان کے ضلع جعفر آباد کی یوسی شاہان پلال کے 8 ماہ کے بچے میں پولیو وائرس کی تصدیق کی گئی ہے۔ اسی طرح قلعہ عبداللہ کے علاقے پنج پیرانی کے 9 ماہ کے بچے میں بھی پولیو وائرس پایا گیاہے۔

ذرائع کا کہنا ہے کہ خیبر پختونخوا کے ضلع بنوں کی یونین کونسل حوید کے 30 ماہ کے بچے میں پولیو وائرس کی تصدیق کی گئی ہے۔ اسی طرح بنوں ہی کی یوسی جانی خیل کی 1 سالہ بچی میں پولیو وائرس کی نشاندہی ہوئی ہے۔

ذرائع نے ہم نیوز کو بتایا ہے کہ پولیو کا شکار 3 بچوں کے والدین نے بچوں کی ویکسی نیشن سے انکار کردیا تھا۔ رواں برس پنجاب سے 3 ،بلوچستان سے 2 پولیو کیس سامنے آ چکے ہیں ۔ خیبرپختونخوا سے 25، قبائلی اضلاع سے 8 پولیو کیس سامنے آ چکے ہیں۔

اس خبر پر اپنی رائے کا اظہار کریں

اپنا تبصرہ بھیجیں